🔴 क्षणात निर्णय, तत्पर कारवाई: कोंढव्यात पोलिसांच्या सीपीआरमुळे मृत्यूच्या दाढेतून जीव परतला

मुख्य संपादक- ( अब्दुल बारी खान )

दि. 16/01/2026 रोजी कोंढवा मार्शल पोलीस शिपाई क्र. 9729 वैभव निकम व पोलीस शिपाई क्र. 441 वैभव राक्षे हे दिवस पाळी कर्तव्यावर असताना मिठानगर परिसरात नवरा-बायकोच्या भांडणाबाबत कंट्रोल रूमकडून कॉल प्राप्त झाला.

घटनास्थळी पोहोचल्यानंतर कॉलर यास्मिन तांबोळी यांनी पोलिसांना सांगितले की त्यांचे पती साजिद यांनी स्वतःला बेडरूममध्ये कोंडून घेतले आहे. पोलिसांनी दरवाजाबाहेरून आवाज दिला असता आतून कोणतीही प्रतिक्रिया मिळाली नाही. परिस्थितीचे गांभीर्य ओळखून पोलिसांनी बेडरूमचा दरवाजा तोडला.

दरवाजा उघडताच साजिद हे पंख्याला लटकलेल्या अवस्थेत आढळून आले. क्षणाचाही विलंब न करता पोलिस अंमलदारांनी त्यांना खाली उतरवून तत्काळ सीपीआर दिला. पोलिसांच्या या तत्पर व धाडसी कारवाईमुळे साजिद यांना शुद्धी आली.

त्यानंतर पुढील उपचारासाठी त्यांना तातडीने ससून सर्वोपचार रुग्णालयात दाखल करण्यात आले असून त्यांच्यावर उपचार सुरू आहेत. कोंढवा पोलिसांच्या या वेळेवर केलेल्या हस्तक्षेपामुळे एक अनमोल जीव वाचला आहे.