पुणे : कोंढवा बुद्रुक आणि येवलेवाडी पोलीस स्टेशनच्या हद्दीत गुन्हेगारीने डोके वर काढले आहे, पण या गुन्हेगारीला खतपाणी घालणारा माणूस दुसरा कोणी नसून पोलीस दलातीलच एक कर्मचारी असल्याची चर्चा आता उघडपणे होत आहे.
स्थानिक नागरिकांचे नाव न सांगण्याच्या अटीवर धक्कादायक खुलासे:
शेडगे नावाच्या पोलिसाचे ‘प्रोटेक्शन’: परिसरातील जागरूक नागरिकांनी दिलेल्या माहितीनुसार, शेडगे नावाचा पोलीस कर्मचारी या भागात सक्रिय असलेल्या सेक्स रॅकेट आणि इतर अवैध धंद्यांकडून नियमितपणे ‘वसुली’ करत आहे. या वसुलीच्या बदल्यात हे अवैध धंदे बिनधिक्कतपणे चालवण्याचे पूर्ण स्वातंत्र्य त्याने या गुन्हेगारांना दिले आहे.
केसर लॉजचा काळा कारभार: ज्या ‘केसर लॉज’वर पोलीस स्टेशनचे कर्मचारी कामाच्या दरम्यान विश्रांतीसाठी जातात, त्याच ठिकाणी वेश्या व्यवसायाचे क्लायंट आणि मुलींची ये-जा सुरू असते. शेडगे यांच्या आशीर्वादाने या लॉजवर कधीही कारवाई होत नाही, असा खळबळजनक आरोप नागरिकांनी केला आहे.
कारवाईचा पत्ताच नाही: केवळ सेक्स रॅकेटच नव्हे, तर या हद्दीतील इतर सर्व प्रकारचे अवैध धंदे चालवणाऱ्यांशी शेडगे यांचे ‘मधुर’ संबंध आहेत. त्यामुळे या परिसरात ना कधी छापेमारी होते, ना कधी कडक कारवाई. गुन्हेगारांमध्ये पोलिसांचा धाक उरला नसून, शेडगे यांच्यामुळे हे गुन्हेगार आता पोलिसांनाच खिशात घेऊन फिरत आहेत.
“आम्ही इथे कुटुंब घेऊन राहतो, पण रस्त्यावरून जाताना आता भीती वाटते. पोलीस स्टेशन जवळ असूनही इथे उघडपणे मुलींचे फोटो दाखवून धंदा केला जातो. शेडगे सारखे कर्मचारी जेव्हा पैसे घेऊन यांना पाठबळ देतात, तेव्हा आम्ही तक्रार करायची कुणाकडे?” – स्थानिक नागरिक
पुणे पोलीस आयुक्तांना जाहीर आव्हान:
‘संविधान न्यूज’ या बातमीच्या माध्यमातून पोलीस आयुक्त अमितेश कुमार यांना विनंती करत आहे की:
१. पोलीस दलाची प्रतिमा मलीन करणाऱ्या ‘शेडगे’ नावाच्या कर्मचाऱ्याची तात्काळ चौकशी करून त्याला निलंबित करा.
२. पोलीस स्टेशनच्या हद्दीतील सर्व अवैध धंदे आणि त्यांना आश्रय देणाऱ्या लॉजेसवर कडक कारवाई करा.
३. खाकी वर्दीत लपलेल्या या वसुलीबहाद्दरांच्या मालमत्तेची चौकशी करा.
“पोलीस दलात असे काही ‘शेडगे’ असल्यावर गुन्हेगारांना कोणाचे भय उरणार? आता आयुक्त या भ्रष्ट कर्मचाऱ्यावर काय कारवाई करतात, याकडे संपूर्ण कोंढव्याचे लक्ष लागले आहे. आम्ही हे प्रकरण तडीस नेल्याशिवाय थांबणार नाही.
