पुणे, कोंढवा परिसरात सरकारी कामात अडथळा निर्माण केल्याप्रकरणी एका पती-पत्नीविरोधात गुन्हा दाखल करण्यात आला आहे. महावितरण कंपनीच्या अधिकाऱ्यांना धमकावणे, शिवीगाळ करणे आणि कामात अडथळा आणल्याचा आरोप त्यांच्यावर ठेवण्यात आला आहे. सदर प्रकरणी कोंढवा पोलीस ठाण्यात गुन्हा क्रमांक 0227/2026 नोंद करण्यात आला असून पुढील तपास सुरू आहे.
मिळालेल्या माहितीनुसार, सौ. एनाबेला सॅलिस आणि मारियानो सॅलिस (रा. साई पॅराडाईज अपार्टमेंट, कोंढवा खुर्द, पुणे) यांनी दलित महिला सौ. श्वेता कुणाल गोंधळे-जगताप यांच्या घराचा वीजपुरवठा बेकायदेशीरपणे खंडित केल्याचा आरोप आहे. त्यांनी वीज मीटरपासून वायर तोडून पुरवठा बंद केल्याची तक्रार संबंधित महिलेने महावितरणकडे केली होती.
तक्रारीनंतर महावितरणचे सहाय्यक अभियंता विशाल सदाशिव सोनवणे हे आपल्या सहकाऱ्यांसह घटनास्थळी वीजपुरवठा पूर्ववत करण्यासाठी गेले होते. मात्र, त्या वेळी आरोपी पती-पत्नी यांनी अधिकाऱ्यांना सहकार्य करण्याऐवजी विरोध केल्याचे FIR मध्ये नमूद आहे.
घटनास्थळी अधिकाऱ्यांनी मीटर रूमची किल्ली मागितली असता, संबंधितांनी ती देण्यास नकार दिला. तसेच, अधिकाऱ्यांशी वाद घालत त्यांना धमक्या दिल्या, शिवीगाळ केली आणि शारीरिक धक्काबुक्की केल्याचा आरोप आहे. यामुळे महावितरणच्या अधिकाऱ्यांना त्यांचे सरकारी काम पार पाडता आले नाही.
0227/2026
या प्रकारामुळे सरकारी कामात अडथळा निर्माण झाल्याने भारतीय न्याय संहिता 2023 अंतर्गत कलम 132, 352 व 3(5) प्रमाणे गुन्हा दाखल करण्यात आला आहे. सदर घटना 18 ऑक्टोबर 2025 रोजी दुपारी घडली असून त्यानंतर तक्रार दाखल करून 26 मार्च 2026 रोजी FIR नोंदविण्यात आली आहे.
0227/2026
दरम्यान, या प्रकरणाला आणखी एक गंभीर पार्श्वभूमी असल्याचे समोर आले आहे. आरोपी सौ. एनाबेला सॅलिस यांच्यावर याच दलित महिला सौ. श्वेता गोंधळे-जगताप यांच्यावर अत्याचार केल्याप्रकरणी ॲट्रॉसिटी अंतर्गत गुन्हा यापूर्वीच दाखल असून त्या प्रकरणाची न्यायालयीन प्रक्रिया सध्या सुरू आहे.
पोलिसांनी दिलेल्या माहितीनुसार, या प्रकरणाचा पुढील तपास पोलीस उपनिरीक्षक स्नेहल जाधव यांच्याकडे सोपविण्यात आला आहे. संबंधित घटनेमुळे परिसरात काही काळ तणावाचे वातावरण निर्माण झाले होते.
सरकारी कर्मचाऱ्यांना धमकावणे आणि त्यांच्या कामात अडथळा निर्माण करणे ही गंभीर बाब असून, तसेच दलित महिलेच्या तक्रारीचा मुद्दा लक्षात घेता या प्रकरणाकडे विशेष लक्ष दिले जात आहे. सर्व बाबींचा सखोल तपास करून दोषींवर योग्य ती कायदेशीर कारवाई करण्यात येणार असल्याचे कोंढवा पोलिसांकडून स्पष्ट करण्यात आले आहे.
