मुख्य संपादक – ( अब्दुल बारी खान )
पुणे शहरातील कोंढवा खुर्द परिसरात अमली पदार्थविरोधी मोहिमेदरम्यान कोंढवा पोलीस ठाण्याच्या पथकाने मोठी कारवाई करत मेफेड्रोन (एमडी) ड्रग्जसह एका व्यक्तीस अटक केली आहे. या कारवाईत एकूण २ लाख ५२ हजार ६१० रुपयांचा मुद्देमाल जप्त करण्यात आला आहे.
दि. ६ फेब्रुवारी २०२६ रोजी रात्री ९.४० वाजण्याच्या सुमारास, कॅम्प कोतवा लेन, खुल्लानगर बस स्टॉपसमोरील सार्वजनिक रस्त्यावर पोलिसांनी सापळा रचून ही कारवाई केली. अटक करण्यात आलेल्या आरोपीचे नाव इरफान नासिर खान (वय ४०, रा. गोल्डन टेरेस, फ्लॅट नं. ३०३, मिठानगर, कोंढवा खुर्द, पुणे) असे आहे.
पोलिसांनी केलेल्या अंगझडतीत आरोपीच्या जीन्स पॅन्टच्या खिशातून ११.५० ग्रॅम मेफेड्रोन (एमडी) ड्रग्ज आढळून आले. या अमली पदार्थाची अंदाजे किंमत २ लाख २८ हजार रुपये असल्याचे पोलिसांनी सांगितले. याशिवाय आरोपीकडून सॅमसंग गॅलेक्सी M-16 मोबाईल (किंमत २० हजार रुपये) तसेच ४,६१० रुपये रोख रक्कम जप्त करण्यात आली आहे.
या प्रकरणी आरोपीविरुद्ध एन.डी.पी.एस. कायदा कलम ८(क) व २१(ब) अन्वये गुन्हा दाखल करण्यात आला असून पुढील तपास पोलीस उपनिरीक्षक रविंद्र गावडे (कोंढवा पोलीस ठाणे) करीत आहेत.
