🚨 जिद्दीचा विजय! इंदापूरच्या तसलीम मुलानींची पुणे पोलीस दलात निवड 🚨

उपसंपादक – ( शाहरुख शेख )

पुणे | इंदापूर तालुक्यातील न्हावी गावातील तसलीम अकबर मुलानी यांनी प्रचंड मेहनत, जिद्द आणि संघर्षाच्या जोरावर पुणे शहर पोलीस दलात स्थान मिळवत आपल्या स्वप्नाला यशाची किनार दिली आहे. त्यांच्या या यशामुळे संपूर्ण परिसरात आनंदाचे वातावरण निर्माण झाले असून सर्व स्तरातून त्यांच्यावर अभिनंदनाचा वर्षाव होत आहे.

तसलीम या कैलासवासी माजी सरपंच अकबर निजाम मुलानी यांच्या कन्या असून, पोलीस दलात कार्यरत असलेल्या रशीद हुसेन शेख यांच्याशी त्यांचा जवळचा नातेसंबंध आहे. साध्या कुटुंबातून आलेल्या तसलीम यांनी अत्यंत प्रतिकूल परिस्थितीत हे यश संपादन केले आहे.

त्यांचा दिवस पहाटे ५ वाजता सुरू होत असे. पतीला दुचाकीवरून कंपनीत सोडणे, घरची कामे पूर्ण करणे आणि सकाळी ७ वाजता सरावासाठी ग्राउंडवर हजर राहणे—असा त्यांचा रोजचा दिनक्रम होता. सरावानंतर त्या थेट सुझुकी शोरूममध्ये नोकरीसाठी जात असत. दिवसभर काम करून घरी परतल्यानंतर मुलांचा अभ्यास, स्वयंपाक आणि उरलेल्या वेळेत स्वतःचा अभ्यास—असा त्यांचा संघर्षमय प्रवास सुरू होता.

या प्रवासात अनेक अडचणी आणि टोमण्यांना सामोरे जावे लागले. “तू पोलीस होणार का?” अशा शंका उपस्थित केल्या गेल्या, पण तसलीम यांनी कोणत्याही टीकेकडे दुर्लक्ष करत आपल्या ध्येयावर लक्ष केंद्रित ठेवले.

परीक्षेच्या अंतिम तीन महिन्यांत त्यांनी मोठा निर्णय घेत नोकरीचा राजीनामा दिला आणि पूर्ण वेळ अभ्यास व मैदानी सरावाला दिला. त्यांच्या या कठोर परिश्रमाचे फळ म्हणजे त्यांनी ११० गुण मिळवत पोलीस भरतीत यश संपादन केले.

घर, संसार, मुले आणि नोकरी यांचा समतोल राखत मिळवलेले हे यश अनेक महिलांसाठी प्रेरणादायी ठरत आहे. तसलीम यांच्या या कर्तृत्वाला सर्वत्र सलाम करण्यात येत असून त्यांच्या पुढील वाटचालीसाठी शुभेच्छांचा वर्षाव होत आहे.