मुख्य संपादक ( अब्दुल बारी खान )
तरुणाचा निर्घृण खून करून पसार झालेल्या दोन आरोपींना आंबेगाव पोलीसांनी अवघ्या काही तासांत नांदेड येथून अटक करत उल्लेखनीय कामगिरी बजावली आहे.
दिनांक २२/१२/२०२५ रोजी सायंकाळी सुमारे ८.४५ वाजता, फिर्यादी हे आपले नातेवाईक मयत जावेद खादमियों पठाण (वय ३४) यांच्यासोबत गुरुदत्त वॉशिंग सेंटर, गायमुख चौक, आंबेगाव बुद्रुक, पुणे येथे काम करत होते. यावेळी जावेदच्या मैत्रिणीचा लहान भाऊ संदीप रंगराव भुरके (वय २५) व त्याचा मित्र वॉशिंग सेंटरवर आले. प्रेमसंबंधाच्या रागातून त्यांनी जावेद याच्याशी हुज्जत घालून लोखंडी हत्याराने डोक्यावर व हातावर गंभीर वार केले आणि घटनास्थळावरून पळ काढला. गंभीर जखमी जावेद यांचा उपचारादरम्यान मृत्यू झाला.
या प्रकरणी फिर्यादी रोफ उस्मान शेख यांनी दिलेल्या तक्रारीवरून आंबेगाव पोलीस स्टेशन येथे गु.र.नं. ३६५/२०२५ अन्वये भा.न्या.सं. २०२३ चे कलम १०३(१), ३(५), आर्म अॅक्ट ४(२५), मपोअधि कलम ३७(१)(३) सह १३५ प्रमाणे गुन्हा दाखल करण्यात आला.
तपासादरम्यान मयत व आरोपी हे मूळचे भोकर, नांदेड येथील शेजारी असल्याचे तसेच आरोपी खून केल्यानंतर नांदेड येथे पळून गेल्याची माहिती मिळाली. त्यानुसार तपास पथकाचे प्रभारी पो.उपनि. मोहन कळमकर व पो.अं. चेतन गोरे, निलेश जमदाडे, हरिश गायकवाड यांना तात्काळ नांदेड येथे रवाना करण्यात आले. स्थानिक पोलीसांच्या मदतीने भोकर व नांदेड शहर परिसरातून दोन्ही आरोपींना ताब्यात घेण्यात आले.
अटक केलेल्या आरोपींची नावे:
संदीप रंगराव भुरके (वय २५)
ओमप्रसाद उर्फ दत्ता गणेश किरकन (वय २०)
(रा. चिखलवाडी, प्रफुलनगर, ता. भोकर, जि. नांदेड)
आरोपींना आंबेगाव पोलीस स्टेशन येथे आणून कसून तपास केला असता त्यांनी गुन्ह्याची कबुली दिली. सदर गुन्ह्यात त्यांना अटक करण्यात आली असून पुढील तपास पोलीस निरीक्षक (गुन्हे) श्री. गजानन चोरमले करीत आहेत. मा. न्यायालयाने आरोपींना दिनांक ०१/०१/२०२६ पर्यंत पोलीस कोठडी सुनावली आहे.
ही कारवाई पोलीस आयुक्त पुणे शहर मा. अमितेश कुमार, सह पोलीस आयुक्त मा. रंजनकुमार शर्मा, अपर पोलीस आयुक्त (पश्चिम विभाग) मा. राजेश बनसोडे, पोलीस उपआयुक्त परिमंडळ-२ श्री. मिलिंद मोहिते, सहाय्यक पोलीस आयुक्त भारती विद्यापीठ विभाग श्री. राहुल आवारे यांच्या मार्गदर्शनाखाली तसेच वरिष्ठ पोलीस निरीक्षक श्री. शरद झिने यांच्या नेतृत्वाखाली आंबेगाव पोलीस स्टेशनच्या पथकाने यशस्वीपणे पार पाडली.
