पुणे | प्रतिनिधी
पुणे महानगरपालिका हद्दीतील लेन नंबर २१, शिवनेरी नगर, कोंढवा खुर्द येथे नियमांना धाब्यावर बसवून इमारत बांधकामाचे काम खुलेआम आणि जोरात सुरू असल्याचे धक्कादायक वास्तव समोर आले आहे. स्थानिक नागरिकांच्या आरोपानुसार, हे संपूर्ण बांधकाम पुणे महानगरपालिकेच्या आशीर्वादानेच सुरू असून कोणतीही भीती न बाळगता दिवस-रात्र काम चालू आहे.
अरुंद रस्त्यांवर मोठमोठी वाहने उभी राहत असून सिमेंट, वाळू व लोखंडाचा साठा रस्त्यावरच करण्यात आला आहे. परिणामी नागरिकांचे ये-जा करणे अवघड झाले असून लहान मुले, वृद्ध आणि महिलांना प्रचंड त्रास सहन करावा लागत आहे. धूळ, आवाज आणि प्रदूषणामुळे परिसरातील आरोग्य धोक्यात आले आहे.
सदर बांधकामास आवश्यक परवाने, मंजूर नकाशे, सुरक्षा नियम व पर्यावरणीय अटींचे पालन केले जात आहे का, याबाबत मोठा संशय व्यक्त केला जात आहे. नागरिकांनी वारंवार तक्रारी करूनही महानगरपालिका प्रशासनाकडून कोणतीही ठोस कारवाई होत नसल्याने प्रशासनाच्या भूमिकेवर गंभीर प्रश्नचिन्ह निर्माण झाले आहे.
“जर हे बांधकाम अधिकृत असेल तर सर्व कागदपत्रे जाहीर करावीत, अन्यथा त्वरित काम थांबवून कठोर कारवाई करावी,” अशी संतप्त मागणी स्थानिक नागरिकांकडून करण्यात येत आहे.
पुणे महानगरपालिका प्रशासन या प्रकरणात मौन बाळगत असल्याने, अवैध बांधकामांना अभय दिले जात आहे का? असा सवाल आता सर्वसामान्य नागरिक विचारत आहेत. या प्रकरणात तातडीने चौकशी करून दोषींवर कारवाई न झाल्यास आंदोलनाचा इशाराही नागरिकांनी दिला आहे
